என் தாய் மொழியாம் தமிழே

உலகத் தாய் மொழி நாள்
என் தாய் மொழியாம் தமிழே
முந்தை மொழியாயும்
என் தந்தை மொழியாயும்
பிந்தை வரும் மொழிகளுக்கெல்லாம்
விந்தை மொழியாயும்
விண் தொட்டு மண் தொட்டு
மாறா அழகுடன்
தரணி ஆழும் தமிழாய்

என்னுள் எழுந்த இனியவளே
உன்னில் இருந்தல்லவா நான்
உலகத்தை அறிந்து தெளிந்து
கொண்டேன் எல்லாம் உன்னால்
எனக்கு வாய்த்தது

வற்றாப் பெருங் கடல் நீ

அமுதம் கடைய அவசியமில்லை
அமுதமே நீ அல்லவா
பொற்றாமரைக் குளத்தில்
பூத்து நின்றாயாம்
எற்றி எதிரிகள் குரல் அடைக்க
வெற்றிகள் கைவர
என் நாவில் நடம் புரியும்
கொற்றவள் நீ

சிந்து சம வெளி முதல்
கீழடி என விரிந்து
அரிக்கமேடு தாண்டி
ஈழம் வரை
உன் முது தொல் மரபுகள்
பரந்து விரிந்து படர்ந்து
தெரிந்து கொள்ள
செவ்விலக்கியங்களும்
செழுமை சீர் தொல்காப்பியமும்
சிலப்பதிகாரமும்
திருக்கரசை புராணமும்
என சொல்லாத சேதிகள் பல
இந்த உலகுக்கு தந்தவளே

உன்னைப் போற்றி
ஒரு கவியென்ன
ஓராயிரம் கோடி
கவிதை பாடுவேன்
இன்னும் இன்னும்
காலாதி காலம் முழுவதும்
உன் ஆட்சி
உலகம் முழுமைக்கும்
வாழியவே வாழியவே