சேனையூரின் உள் முக தரிசனம்

சேனையூரின் உள் முக தரிசனம்
எண்ணங்கள் நீள
நடக்கிறேன் என்னூர்
தெருக்கள் தோறும்

வண்ணங்கள் குழைத்த
குடை கவிழ் மரங்களின்
ஆட்சி

கோயிலடியும் புளிய மரமும்
பன்னீர் மரத்தின்
பச்சைப் பூக்களும்
வாசகசாலையும் ஆசுப்பத்திரியும்
வழி விட்டு நீளும்
பாடசாலையும்
நினைவுப் பூவில்
விரிந்து சொல்லும்
ஆயிரமாயிரம் கதைகளின் நீட்டம்
புழுதி பறக்க
வார் ஓடியதும்
சிறட்டை பந்தும்
சில்லுக் கோடும்
கிளித்தட்டும்
கூழாம் பாண்டியும்
நொண்டி அடிச்சானும்
நண்பர்கள் சேர
விளையாடியதும்
இந்த வீதிகள்தாம்

பணிவு வளவில்
கண்ணா மரத்தில்
ஒளித்து விளையாடி
ஓடிப் பிடித்ததும்
இந்த தெருக்களில்தான்
குரங்கு கேணியில்
இழனி ஆய்ந்து
இட்டம் போல
முட்டுத்தேங்காய்
உரித்து உண்டதும்
இந்த தெருக்கள்தான்
ஆச்சி கையால்
அப்பம் சாப்பிட்டு
கற்பகம் மாமியின்
கடையல் உண்டு
ஆச கடையில்
றசுக்கு வேண்டி
கொட்டைத் தேங்காய்
வெட்டி உடைத்து
அந்த ருசியில்
அனைத்தும் மறந்து
மச்சாள் மாருடன்
ஆடி மகிழ்ந்ததும்
இந்த தெருக்கள்தான்
முள்முருக்கையில்
குழலை வெட்டி
பாவட்ட மரத்தில்
அச்சு செய்து
அதன் கொட்டையெடுத்து
உள் வைத்து தள்ளி
வெடியாய் பாவனை செய்து
விளையாடித் திரிந்ததும்
எங்கள் சேனையூர் வீதிதான்
உயரத்திருந்து என்
சேனையூரின்
உள்முக தரிசனம்